၁-၂။ ရေးခဲ့ဘူးသော စာများတွင် အမည်နာမ တပ်၍ ရေးသားခြင်းရှားပါးလှသလို ရေးမိသောအခါတွင်လည်း 'ခေါင်'ကိုမှ ရေးခြင်းဖြစ်ရာ 'ငါ ဘာ့ကြောင့် ရေးလိုပါသနည်း' ဟူသည့် ဇောစေတနာကို သေချာစဉ်းစားရပါသည်။ အပြစ်တင်လိုခြင်း၊ ချီးကျူးလိုခြင်းထက် မြန်မာနိုင်ငံ၏တိုးတက်ရေးအတွက် 'ဇောင်းပေးလိုသော' စေတနာဖြင့်သာ ဦးစားပေးဖေါ်ထုတ်ရန် ဆုံးဖြတ်ပါသဖြင့် ဆိုလိုရင်းကို ရောက်မရောက် မသေချာသော်လည်း အပြစ်တင်လျှင်မူ ခံယူရန်အသင့်ရှိကြောင်း ပြောပါသည်။ မြန်မာပြည်သားတို. လူ.အခွင့်အရေးရရှိရေးကို တစိုက်မတ်မတ် အားထုတ်ခဲ့သော သူမ၏ဆန္ဒကို သိရန်မကြိုးစားပဲ အနည်းငယ်ဝေဖန်မိလျှင်ပင် မင်းက ဘယ်လောက်သိလို.လဲ၊ မင်းထက်သိလို. နိုင်ငံရေးလုပ်နေတာကွ စသည်ဖြင့်လည်းကောင်း၊ စသည်ထက်ပိုသော ဆဲဆိုကြမ်းတမ်းသော စကားတို.ဖြင့်လည်းကောင်း လာရောက်ပြောသူတို.အား စကားထဲပင် ထည့်ပြောရန်မရှိပါ။ မိမိ၏ ခံယူချက်၊ ဆန္ဒ၊ သဘောထား တို.ကို လွတ်လပ်စွာ ထုတ်ဖေါ်ပြောကြားရေးသည် လူ.အခွင့်အရေး၏ အင်မတန်အရေးကြီးသော အစိတ်အပိုင်းဟုသာ ပြောလိုပါသည်။
၁-၃။ သူမအကြောင်းပြောသောအခါ တစ်နွယ်ငင်တစ်စင်ပါ သူမ၏ ပါတီ 'အမျိုးသား ဒီမိုကရေစီ အဖွဲ.ချုပ်' အကြောင်းသည်လည်း ပါဝင်လာရပါမည်။ ကောင်းမကောင်း၊ ညံ့မညံ့ အဆုံးအဖြတ်ပေးခြင်းထက် အပြုသဘောဆောင်သော (မိမိ ဥာဏ်မီသမျှသော) သုံးသပ်ဝေဖန်မှုများကို အားနာပါးနာပေးရပါတော့မည်။နိုင်ငံအတွက် သင့်သည်ထင်လျှင်ယူပါ၊ မသင့်သော ပယ်ပါ ဟုသာ ပြောရပါမည်။ လက်ခံနိုင်ခြင်း မရှိပါက 'အန်အယ်ဒီအတွက်မေတ္တာစာ' ဟုသာ သတ်မှတ်ပေးပါရန် တောင်းပန်ရပေမည်။
၂-၁။ သူမဘ၀ကို ပြန်ကြည့်လျှင် လေးပိုင်းခွဲလိုပါသည်။ (မိမိ ပြောမည့် အပေါ်မူတည်၍ ခွဲခြင်းဖြစ်ပါသည်) ပထမပိုင်းသည် မြန်မာနိုင်ငံသို. ပြန်မလာမှီ ဘ၀၊ ဒုတိယပိုင်းသည် မြန်မာနိုင်ငံအတွင်း နိုင်ငံရေး စတင်လုပ်ဆောင်သော ဘ၀၊ တတိယပိုင်းသည် အကျယ်ချုပ်ခံဘ၀ နှင့် စတုတ္တပိုင်းသည် အကျယ်ချုပ်ခံဘ၀မှ လွတ်မြောက်သော လက်ရှိဘ၀တို.ဖြစ်ပါသည်။ ထိုအပိုင်းတို.သည် လက်ရှိကမ္ဘာကပိုင်ဆိုင်သော 'မဟာလူသား' (ဤစကားကို ယနေ.မြန်မာနိုင်ငံသား အများစု ခံယူနေကြသော သူရဲကောင်းကိုးကွယ်ဝါဒဖြင့် သုံးခြင်းမဟုတ်ပါ) တစ်ဦး ပေါ်ထွက်လာစေရန် အကြောင်း အထောက်အပံ့ ဖြစ်ခဲ့ကြောင်း လက်ခံရပေမည်။
၂-၂။ မြန်မာနိုင်ငံသို. ပြန်မလာမှီကာလသည် အပြုခံဘ၀သာဖြစ်၍ ကန်ရေထဲသို. ပစ်ချခြင်းခံရသော ခဲလုံးတစ်လုံးသည် ရေထဲရှိငါး၊လိပ်၊မိကျောင်းတို.ဖြင့်သာ အဖေါ်ပြုရမည်ဖြစ်သကဲ့သို. နိုင်ငံရပ်ခြားသို. အပို.ခံထားရသူတစ်ဦးအနေဖြင့် အခြားရွေးချယ်ဖွယ်လမ်းမရှိပဲ နိုင်ငံခြားသားတစ်ဦးဖြင့်သာ အိမ်ထောင်ပြုရခြင်းသည် အပြစ်ပြောဖွယ်ရာမရှိပေ။ သို.သော် ဖခင်၏ မျိုးရိုးဗီဇများ အပြည့်ပါနေသောသူမအား အောက်စဖို.ကဲ့သို.သော နိုင်ငံရပ်ခြားတက္ကသိုလ်တစ်ခုအား စေလွှတ်ပညာသင်စေခြင်းသည် 'မြင်းကို ဂျိုတပ်ပေးလိုက်သကဲ့သို.' ဖြစ်သွားစေသဖြင့် မြန်မာနိုင်ငံမှ ဝေးစေရန်အကြံဖြင့် ပို.ထားသူများ၏ မဟာအမှားသာဖြစ်ပေမည်။ ယခု ကမ္ဘာ.ခေါင်းဆောင် အ၀န်းအ၀ိုင်းတွင်ဖြစ်စေ၊ ပညာတတ် အ၀န်းအ၀ိုင်းတွင်ဖြစ်စေ 'ခေါင်းမလျှိုး' ပဲ ၀ံ့ဝံ့စားစား မိန်.ခွန်းပြောနေသော သူမကို ကြည့်ရင်း မြန်မာနိုင်ငံအတွင်း တက္ကသိုလ်တစ်ခုခုတွင်သာ ပညာသင်ခဲ့ပါက ဤသို.ခေါင်းဆောင်တစ်ယောက်ကို ရရှိနိုင်မည်မဟုတ်ဟု တွေးမိပါသည်။ အနောက်ဆန်လွန်းသည် ပြောကြနိုင်သော်လည်း ဤကဲ့သို. အနောက်ဆန်ခြင်းသည်ပင်လျှင် ကောင်းသော အချက်ဖြစ်ပါသည်ဟု 'အနောက်ဆန်ခြင်းနှင့် အနောက်မျှော်ခြင်း ခွဲမသိသူ' အချို.အား ပြောလိုပါသည်။
၂-၃။ နိုင်ငံရပ်ခြားတွင် ပညာသင်ခြင်းကို 'မြင်းကို ဂျိုတပ်ခြင်း'ဟု ပြောပါက မြန်မာနိုင်ငံအတွင်း ရှစ်လေးလုံးကာလတွင် မိခင်ကျန်းမာရေးအတွက် မြန်မာနိုင်ငံသို. ပြန်လာခြင်းကို 'ကျားသေကို အသက်သွင်းခြင်း'ဟု ပြောရပါမည်။ လွတ်လပ်ရေးဖခင်၏ သမီးဖြစ်ခြင်း၊ နိုင်ငံအတွင်းမှ ဖိနှိပ်မှုများကို မျက်ဝါးထင်ထင် မြင်ရခြင်းတို.သည် သူမအားနိုင်ငံရေးလမ်းကြောင်းပေါ်သို. ဆွဲတင်လိုက်နိုင်သော်လည်း 'ယနေ. ခေါင်းဆောင်ပီသလှသော ဒေါ်အောင်ဆန်းစုကြည်ဘ၀သို. ' နေ.ချင်းညချင်း တွန်းပို.နိုင်ခဲ့ခြင်း မရှိပါ။ နိုင်ငံရေးပါးဝနေသော ၀ါရင့်နိုင်ငံရေးသမားကြီးများအလည်၊ ကောက်ကျစ်လှသော ထိုစဉ်ကပြိုင်ဘက်အချို.၏ ကစားကွက်အလည်တွင် အမှားအချို.ပင် လုပ်ခဲ့မိသေးပါသည်ဟု ပြောလျှင်ပင် ရပါသည်။ (၀ိုင်းဆဲလည်းမတတ်နိုင်ပါ) သို.သော် ထိုအမှားမျိုးကို ယနေ.ဒေါ်အောင်ဆန်းစုကြည် အနေနှင့် မည်သို.မှ ထပ်မံဆောင်ရွက်ပြောဆိုသည်ကို မတွေ.ရသဖြင့် 'အင်မတန် တန်ဖိုးကြီးလှသော အမှားများ' ဟုသာ ဆိုသင့်ပါသည်။ မိမိရင်ဆိုင်နေရသူ ဘယ်လိုလူများဖြစ်သည်ဆိုသည်ကို ကောင်းကောင်း သဘောပေါက်သွားခဲ့သည်ဟုပဲ ဆိုရပါမည်။
၂-၄။ နေအိမ်တွင် အကျယ်ချုပ်ဘ၀နှင့် ၀င်လိုက်ထွက်လိုက်လုပ်နေရသော ကာလသည် အဖြစ်အပျက်အနေနှင့် (အလွန်အရေးကြီးသော တစ်ခုနှစ်ခုမှတပါး) ရှားပါးလှသော်လည်း အင်မတန်စိတ်ဝင်စားစရာကောင်းသော အပြောင်းအလဲကာလအဖြစ် သတ်မှတ်လိုပါသည်။ ဥာဏ်ပညာကြီးမားသူတစ်ဦးကို တစ်ဦးတည်း သီးခြားထားလိုက်သောအခါ အဖြစ်အပျက် အခြေအနေ အကြောင်းချင်းရာများကို 'စနစ်တကျ အပြန်ပြန်အလှန်လှန် ဝေဖန်သုံးသပ်ခွင့်' တည်းဟူသော အင်မတန်အကျိုးကျေးဇူးကြီးလှသော အလုပ်ကို လုပ်ခွင့်ရသွားဟန်တူပါသည်။ နောက်ပိုင်း သူမ၏ အရေးကြီးလှသော မိန်.ခွန်းများတွင်လည်း ဤအချက်ကို တစွန်းတစ မြင်နိုင်ကြပါမည်။ နိုင်ငံအတွက် အင်မတန်အရေးကြီးလှသော အပြောင်းအလဲသည်လည်း ထိုအချိန်မှ စလာဟန်တူပါသည်။ ထိုအပြောင်းအလဲသည် သူမ၏ 'စိတ်ဓာတ်ဆိုင်ရာအပြောင်းအလဲ' ပင်ဖြစ်ပါမည်။ သူမအတွက် အသက်ကိုပင် စွန်.နိုင်ကြသူများ၊ သူမကဲ့သို.ပင် ဖိနှိပ်ချုပ်ချယ်ခံနေကြရသူများအတွက် (သည်လေဒီ ဇာတ်ကားထဲကလို ကြမ်းပြင်ပေါ် တုံးလုံးလှဲ၍ ငိုနေမည်ဟု လုံးဝမယုံကြည်ပါ) ပို၍ မြင့်မြတ်သောလမ်းကို ရွေးချယ်လိုက်သည်ဟုပင်ဆိုနိုင်ပါည်။ (နိုင်ငံအရေးမှ လူသားအရေးကို ပြောင်းလဲလာခြင်းကို ဆိုလိုပါသည်။) အစပိုင်းတွင်မူ ခေါင်းမာခြင်းသက်သက်သာဖြစ်သည်။ နောက်ပိုင်းတွင် ယုံကြည်ချက်အတွက်ခေါင်းမာမှုဖြစ်ပါမည်။ နောက်ဆုံးတွင်မူ လူ.လွတ်လပ်ခွင့်အတွက် ခေါင်းမာမှုကိုပင် ဖယ်ရှား၍ မိမိအား နှိပ်စက်ကလူပြုခဲ့သူတို.ကိုပင် မိတ်ဆွေအဖြစ် သဘောထားနိုင်သော စိတ်အဖြစ်ပြောင်းလဲလာခြင်းပင်ဖြစ်ပါသည်။ ဖခင်၏ စိတ်ဓာတ်အမွေကို ထိုအချိန်တွင် 'တင်းပြည့်ကျပ်ပြည့်' ရရှိသွားသည်ဟု သတ်မှတ်လိုပါသည်။
၂-၅။ အကျယ်ချုပ်ဘ၀မှ လွတ်မြောက်သော အချိန်ဝယ် သူမသည် အစစအရာရာ အသင့်ဖြစ်နေခဲ့ပြီ ဖြစ်ပါသည်။ ပြည်သူလူထု၏ မကြုံစဖူး ထောက်ခံအားပေးမှု၊ သူမ ခေါင်းဆောင်ပီသသော ဆုံးဖြတ်ချက်တို.သည် မြန်မာတွင်သာမက ကမ္ဘာပေါ်တွင်ရှားပါးသော 'မဟာလူသားတစ်ဦး' ကို မွေးထုတ်ပေးလိုက်ခြင်းဖြစ်ပြီး ကမ္ဘာစီးပွားရေးဖိုရမ် ကဲ့သို.သော အခမ်းအနားများသည်ပင် သူမကြောင့် ဂုဏ်တက်လာရသော အနေအထားသို.ရောက်လာခဲ့သည်။ အစဉ်အလာကြီးလှသော အောက်စဖို.တက္ကသိုလ်၏ ဂုဏ်ထူးဆောင်ဒေါက်တာဘွဲ.၊ ကိန်းကြီးခန်းကြီးနိုင်လှသော ဗြိတိသျှတို.၏ခန်းမတွင် မိန်.ခွန်းပြောကြားခွင့်တို.သည် မြန်မာကို ကမ္ဘာက သိစေရုံမက မြန်မာတို.အတွက် ဂုဏ်ယူဖွယ်အကြောင်းများပင်ဖြစ်သည်။ (မဟာလူသားဟု နှစ်ကြိမ်တိုင်သုံးနှုန်းခြင်းသည် သည်းခံခြင်း၊ခွင့်လွှတ်ခြင်းစသော လူသား၏ 'အမြင့်ဂုဏ် သတ္တိ' ကို ထွန်းလင်းပြနေသောကြောင့် သုံးခြင်းဖြစ်ပါသည်။ ပုဂ္ဂိုလ်ရေး ကိုးကွယ်မှုဖြင့် သုံးခြင်းမဟုတ်ပါ။) နိုင်ငံတကာ အလည်တွင် အရည်အသွေး၊အဆင့်အတန်း၊အတွေးအခေါ် တင်းပြည့်ကျပ်ပြည့် ရှိကြောင်းကို ရိုဟင်ဂျာအရေးကဲ့သို.သောကိစ္စများတွင် နိုင်ငံတကာလက်ခံနိုင်သော၊ ပြည်သူလက်ခံနိုင်သော 'ပညာသားပါသည့် တစ်ကွက်ကျောမှတ်ချက'် ပြုခြင်းမျိုးတွင် တွေ.နိုင်ပါသည်။
၃-၁။ သို.ရာတွင် ကမ္ဘာလုံးဆိုင်ရာ ခေါင်းဆောင်တစ်ဦး ဖြစ်သွားသည့်အတွက် အားနည်းသွားနိုင်သော နေရာများလည်း ရှိနေပါသည်။ အားနည်းသွားနိုင်သောဟူသည် အားနည်းသွားသော ဟူသည့် 'တစ်ထစ်ချ ကောက်ချက်ဆွဲသောစကား' မဟုတ်မှန်း သိစေချင်သလို စေတနာဖြင့် ပြောသော စကားမှန်းလည်း သိစေချင်ပါသည်။ မှားနိုင်ပါသည်ဟုလည်း ကြိုတင်ဆိုပါသည်။
၃-၂။ ပထမဆုံးအနေနှင့် အလွန်အကျွံ ပုဂ္ဂိုလ်ရေး ကိုးကွယ်မှုများကြောင့် လူထုနှင့် ကင်းကွာသွားနိုင်ခြင်းပင် ဖြစ်ပါသည်။ လူထုခေါင်းဆောင်တစ်ယောက်သည် လူထုအထက်သို.တက်သွားရမည်လား၊ လူထုကြားထဲ တရွေ.ရွေ. တိုးဝင်သွားရမည်လား မသေချာသော်လည်း တစ်မတ်တန်းမှ ရုပ်ရှင်ကြည့်ခဲ့သော၊ ရဲဘော်များအကြားတွင်တိုးဝှေ.၍ ထမင်းစားခဲ့သော၊ အင်္ကျီဘောင်းဘီ နှစ်စုံသာရှိသော သူမဖခင်၏ပုံရိပ်သည် မြန်မာလူထုအကြားဝယ် တမြေ့မြေ့ တမ်းတစရာအဖြစ်ရှိနေဆဲပင် ဖြစ်သည်။ ဖခင်၏ ပုံစံအတိုင်း လိုက်လုပ်ရန်ပြောခြင်း မဟုတ်သော်လည်း ပြည်သူလူထုနှင့် 'နီးရက်နှင့် ဝေးနေသော ခေါင်းဆောင်မျိုး' မဖြစ်စေချင်သည်ကတော့ အမှန်ပင်။
၃-၃။ နောက်ထပ်ကင်းကွာ သွားနိုင်သည်ကတော့ သူမ၏ ပါတီနှင့်ပင်ဖြစ်သည်။ သူမ၏ အရှိန်အ၀ါအား ကြီးလွန်းသောအခါ ဆုံးဖြတ်ချက်မှန်သမျှသည် ရှုထောင့်ပေါင်းစုံမှ အကြေအလည်ဆွေးနွေး၍ ရလာခြင်းမျိုးမဟုတ်ပဲ တစ်ချက်လွှတ်ကိစ္စ ဖြစ်သွားမည်စိုးရပါသည်။ အာဏာရှင်စနစ်ကို တိုက်ဖျက်သူများကိုပင် အာဏာရှင်အဖြစ် မသိမသာပြောင်းသွားစေသော လူတို.၏ ပုဂ္ဂိုလ်ရေး ကိုးကွယ်မှု ကို ကြိုတင် မစဉ်းစား၍ မဖြစ်ပါ။ တစ်ဆက်တည်း ပြောလိုသည်မှာ အတိုက်အခံများနှင့်လည်း ကင်းကွာသွားနိုင်ခြင်းဖြစ်သည်။ အမှန်စင်စစ် အတိုက်အခံများနှင့် အရမ်းကွာခြားမှုမရှိမှသာ နိုင်ငံတည်ဆောက်ရေးတွင် အပြိုင်အဆိုင် ပြောဆိုဆွေးနွေးရမည်ဖြစ်သည်။ တစ်ဖက်မှ အရမ်းမြင့်ပြီး တစ်ဖက်မှ ပုံမှန်ရှိနေသည့်အခါ ပါဝါချိန်ခွင်တစ်ဖက်စောင်းနင်း ဖြစ်နေနိုင်သလို 'ဘောလုံးပညာမယှဉ်နိုင်လျှင် လူချတတ်သော ကိစ္စ' ဖြစ်မလာနိုင်ဟုလည်း မပြော၍မရပါ။
၎-၁။ ယနေ. ဒေါ်အောင်ဆန်းစုကြည် အနေနှင့် ရှေ.တန်းသို.ရောက်နေသော်လည်း နောက်တန်းမှ ထောက်ကူပံ့ပိုးနေကြသူများအနေနှင့် ကျန်နေခဲ့ဟန်တူပါသည်။ လိုအပ်သော သတင်းထုတ်ပြန်မှုများ၊ အချက်အလက်ပံ့ပိုးမှုများ၊ လုံခြုံရေး အစီအမံများကို အချိန်နှင့် တပြေးညီပံ့ပိုးပေးရန် လိုအပ်ပါသည်။ (ယခုစာကိုရေးရန် သူမ၏ မိန်.ခွန်းများကို ပြန်လည်ရှာဖွေရာ တစုတစည်းထဲ မတွေ.ရပါ၊ အင်မတန် ရှက်စရာကောင်းပါသည်) ယခုတစ်ထိုင်တည်း စဉ်းစားမိသမျှ ပြောကြည့်ပါမည်။
၎-၂။ ဒေါ်အောင်ဆန်းစုကြည် အနေနှင့် Official Website တစ်ခုရှိရပါတော့မည်။ သူမ၏ မိန်.ခွန်းများ၊မှတ်တမ်းများ၊ ခရီးစဉ်များ အား ပြည်သူအား အချိန်နှင့်တပြေးညီထုတ်ပြန်ပေးရန်လိုပါသည်။ မလိုလားအပ်သော ကောလဟာလများအား တားဆီးရန်ဖြစ်သလို ပြည်သူနှင့် ဆက်ဆံရေးတိုးမြှင့် လိုက်သောတံခါးပေါက်လည်း ဖြစ်ရပါမည်။ ဘားရက်အိုဘားမား ဖေ့စ်ဘုတ်သုံးခြင်းကဲ့သို.သော ပြည်သူနှင့် အဆက်အဆံပြုရေးသည် အလွန်အရေးကြီးသော အရာဖြစ်သကဲ့သို. မှတ်တမ်းမှတ်ရာအဖြစ်ရှိရေး၊ ထရန်စ်ပဲရန်စီဖြစ်ရေး တို.အတွက်လည်း အရေးကြီးသည်ဟု ဆိုပါမည်။ လိုအပ်လျှင်ကိုးကားနိုင်ရန် မိန်.ခွန်းပေါင်းချုပ်မျိုးကိုလည်း စီစဉ်သင့်နေပါပြီ။
၎-၃။ နောက်တစ်ချက် အရေးကြီးသော ကိစ္စမှာ ဒေါ်အောင်ဆန်းစုကြည်အနေနှင့် အတွင်းရေးမှူးတစ်ယောက် ထားရှိရေးဖြစ်ပါသည်။ 'မည်ကာမတ္တ' အတွင်းရေးမှူးမျိုးကိုပြောသည်မဟုတ်ပဲ အနာဂတ်တွင် လက်လွှဲပေးရမည့် ဆက်ခံသူတစ်ယောက်ကို အနီးကပ်သင်ကြားပေးခြင်းမျိုးကို ဆိုလိုပါသည်။ အင်မတန်အရေးကြီးသော နေရာဖြစ်သည့်အလျှောက် ယုံကြည်စိတ်ချရခြင်းမျိုးသာမက အသက်အရွယ်နုပျိုခြင်း၊ နိုင်ငံရေးခံယူချက်မြင့်မားခြင်း၊ ဥာဏ်ပညာ အမျော်အမြင်နှင့်ပြည့်စုံခြင်း စသည်တို.နှင့် ပြည့်စုံရမည်ဖြစ်ပြီး နိုင်ငံရေးခါးဆက်ပြတ်ခြင်းကို ကာကွယ်နိုင်ရန်ဖြစ်ပါသည်။ ထိုသို.သော အတွင်းရေးမှူးတစ်ယောက်ကို ရှာဖွေမွေးမြူသင့်ပြီဟု ဆိုပါမည်။
၎-၄။ နောက်တစ်ခုသည် လုံခြုံရေးကိစ္စဖြစ်ပါသည်။ ကြည့်လိုက်လျှင် လုံခြုံရေး အင်မတန်အားနည်းပါသည်။ လူဆိုသည်မှာ ချစ်သူမည်မျှပင်ပေါပေါ မုန်းသူရှိနေတတ်ပါသည်။ ထိုမျှသာ ဆိုပါမည်။
၅-၁။ ပြောခဲ့သမျှသည် စေတနာဖြင့် ပြောသောစကားများသာ ဖြစ်ပါသည်။ ရှားရှားပါးပါး အဆင့်ဆင့် မီးအထပ်ထပ်ခတ်ပြီးမှ ရရှိလာသော ကြေးသွန်းရုပ်ထုကဲ့သို. ခေါင်းဆောင်တစ်ဦးကို ဘာမဟုတ်သော အဖြစ်များဖြင့် အထင်မြင်သေးမခံစေချင်ပါ။ ထို.အပြင် အချိန်ကလည်း အင်မတန်ရှားပါးနေပါသည်။ ထို.အတူ အားရဖွယ်မျိုးဆက်လည်း မမြင်မိသေးပါ။ ပြောလိုက်မိလျှင် ၀ိုင်းဆဲကြသော ကိစ္စကလည်း ရှိသေးသည်။ ဂုဏ်ယူထိုက်သူတစ်ဦးကို ဂုဏ်ယူတတ်စေရန်လည်းကောင်း၊ တိုင်းပြည်တိုးတက်ရန် လိုအပ်သော အကြောင်းအထောက်အပံ့အဖြစ် ကူညီနိုင်ကြစေရန်လည်းကောင်း ရေးသားရပါသည်။
၅-၂။ ထို.ထက်ပို၍ ဆိုရန်မရှိပါ။
No comments:
Post a Comment