တစ်နေ.က 5 series မှာ ထူးအိမ်သင် ၇နှစ်ပြည့် အမှတ်တရ အစီအစဉ် ကြည့်ရပါတယ်။ ဘယ်က ကလေးတွေမှန်းလည်းမသိပါဘူး။ ၀င်ပြောနေလိုက်ကြတာ။ နားကလောပါတယ်။ ထူးအိမ်သင်ကိုလည်းလူချင်းမသိ၊ သူ. Work ကိုလည်း မသိပဲ ကိုငှက်၊ကိုငှက်နဲ. ဇွတ်လွမ်းပြနေကြတာပါ။ ကိုငှက်တို.၊ ငှက်ကြီးတို. ခေါ်လိုက်လို.သူတို.နဲ.တန်းတူ၊လယ်ဗယ်တူဖြစ်သွားပြီများမှတ်နေပြီလားမသိ။
သူဆိုတာကိုလည်းကြိုက်ပါတယ်၊ငယ်ငယ်ကတည်းကသူ.သီချင်းတွေနဲ.ကြီးပြင်းလာတာပါ။ ဒါပဲပြောတတ်ကြပါတယ်။သျှပ်မှူးကျော်ကဗျာတွေအကြောင်း၊ စင်သီယာကဗျာတွေအကြောင်းသိကြမယ်လည်းမထင်။ ဒီလိုဆိုရင်လည်းထုတ်လွှင့်မနေပါနဲ.တော့။
++++++
ထူးအိမ်သင်ကို ချစ်တယ်သာပြောနေကြတယ်။သူ.သီချင်းတွေကို အားလုံးပြန်စုစည်းပေးပြီးကြပြီလား။သူရေးခဲ့တဲ့သီချင်းတွေ အားလုံးစုပြီးပါပြီလား။ သူမဆိုပေမယ့်သူရေးခဲ့တဲ့သီချင်းတွေရှာဖွေပြီးခဲ့ပါပြီလား။ ဥပမာ တူးတူးရဲ. ရင်ခွင်အိုသစ်စီးရီးထဲက စမ်းချင်းစမ်းလေ ဆိုတဲ့သီချင်းမျိုး။
နောက်ပြီးတော့ သူဆိုခဲ့တဲ့သီချင်းတွေထဲက ဗားရှင်းမတူတာလေးတွေ ပြန်ရှာဖွေ စုစည်းပေးကြရင်ကောင်းပါမယ်။ လက်လမ်းမှီသူတွေ ပေါင်းလုပ်ရင်ရပါတယ်။ ဥပမာ အမေ့အိမ်ဆိုရင် ဗားရှင်းသုံးမျိုးလောက်ရှိမယ်ထင်ပါတယ်။ လူနဲ.အင်္ကျီ ဆိုရင် ဆိုပေါက် ကအစကွာသွားတာပါ။ နောက်ဝေးသွားတဲ့ အခါသီချင်း၊ အောင်ရင်နဲ.တွဲဆိုခဲ့တဲ့ မဆုံးတဲ့သီချင်း၊စတဲ့သီချင်းတွေမှာ တစ်ပုဒ်နဲ.တစ်ပုဒ် ဆိုပုံလေးတွေပြောင်းထားတာလေးတွေ လေ့လာစရာနားထောင်ချင်စရာတွေပါပဲ။
နောက် အတွဲခွေတွေထဲကသီချင်းလေးတွေ စီးရီးအဖြစ်ပြန်စုစည်းပေးစေချင်လိုက်တာ။ တော်တော်များပါတယ်။ နှစ်ခွေသုံးခွေစာရှိလိမ့်မယ်။ သီချင်းစုံသူတွေက အပင်ပန်းခံစုပေးရမှာပါ။ အထူးသဖြင့် သူ.နာမည်မပါပဲ တစ်ပုဒ်စနှစ်ပုဒ်စ၀င်ဆိုတာတွေပျောက်ပျက်သွားမှာစိုးလို.ပါ။ ဟေမာနေ၀င်းရဲ့ ပိုးဖလံစီးရီးထဲက အချစ်ပြီးတော့ အချစ်ဆိုတဲ့သီချင်းမျိုးပေါ့လေ။ စန္ဒယားလှထွဋ်ရဲ့ ပန်းတွေနဲ.ဝေကိုသူပြန်ဆိုခဲ့တာမျိုး၊ သိမ်းထားရမယ့် ဆိုပုံမျိုးပါ။
အဖြစ်စေချင်ဆုံးက ဂျုးရဲ့ မြရဲ့လ၀တ္တုကိုသူဖတ်ခဲ့တာလေးတွေ၊ စောစောက ပြောခဲ့တဲ့သူ.သီချင်းသူ.အသံအားလုံးရယ်၊ အာလုံးစုပြီး ဒီဗီဒီတစ်ချပ်ထုတ်၊ သူ.ကဗျာတွေပါတဲ့ အမှတ်တရစာအုပ်ရယ် ပေါင်းထုတ်လိုက်။
တစ်ခုတော့ရှိတယ်။ သူ.သီချင်းတွေကို အာဇာနည် ပြန်မဆိုရ။ ဂရေဟမ်ပြန်မဆိုရ။ လေးဖြူပြန်မဆိုရ။
ခုတော့သူကိုချစ်တာတွေက ရှိတော့ရှိနေပါရဲ့။ အရှိမဲ့။ ။
No comments:
Post a Comment